18. þáttur – Hæglæti og jólahátíðin – Nína og Bjarney Kristrún Í þessum þætti Hæglætishreyfingarinnar spjalla þær Nína Jóns og Bjarney Kristrún um hæglæti og jólahátíðina. Þær ræða meðal annars um hæglæti á aðventunni, gjafainnkaup og öðruvísi gjafir, mikilvægi samveru við fjölskyldu og vini, jólahefðir, minningar og væntingar til jólanna. Sjá meira um Nínu Jónsdóttir hér:https://www.instagram.com/the.slow.living.mama/ og um Bjarney Kristrúnhttps://www.instagram.com/bjarneyharalds/ Hægt er að gerast félagi í Hæglætishreyfingunni með því að skrá sig hér: https://www.haeglaeti.is/skr%C3%A1%C3%B0u-%C3%BEig-%C3%AD-f%C3%A9lagi%C3%B0

Fjölskyldufræðingurinn Ragnhildur Birna Hauksdóttur og Ingibjörg Ólafsdóttir, stjórnarkona Hæglætishreyfingarinnar, spjalla saman um núvitund. Ragnhildur hefur sérhæft sig í núvitund, áfallafræðum og taugavísindum. Ingibjörg kynntist og nýtti sér núvitund í bataferli sínu upp úr burnouti. Þær fjalla m.a. um kosti núvitundar fyrir heila og taugakerfi barna og fullorðinna, og áskoranir þess að ástunda núvitund. Hvað er núvitund og hvernig stundum við hana? Elur núvitund á FOMO? Erum við hrædd um að missa af lífinu því ,,lífið er núna”? Og hvað ef okkur tekst ekki að njóta í núinu? Af hverju er svona erfitt að hægja á? Getur núvitund hjálpað okkur að temja varnarkerfið okkar? Getur hún tamið villta hestinn innra með okkur sem kveikir sífellt á streitukerfi líkamans og dregur okkur stundum út í skurð? Getum við leyft erfiðum tilfinningum að fara sína leið án þess að trufla þær og stjórna flæði þeirra? Getum við verið forvitin um það sem er í stað þess að fara í dómarahlutverkið? Og hvað gerist með samskipti okkar við náungann og samkennd okkar í því samfélagsmiðlaumhverfi sem við höfum búið til? Um þetta og margt fleira fjalla þær sem og deila góðum ráðum og reynslu af ástundun núvitundar í daglegu lífi. Sjá meira um Ingibjörgu hér: https://www.haeglaeti.is/ingibjorgolafsdottir og um Ragnhildi hér https://www.facebook.com/RBirna

Í þættinum fjallar Þóra Jónsdóttir, stjórnarkona í Hæglætishreyfingunni um hvernig hæglæti getur hjálpað til við að bæta fjárhagslega heilsu. Hún segir frá eigin reynslu af því að hafa verið í heldur neikvæðri fjárhagslegri hegðun fyrri hluta fullorðinsáranna, en með hægara lífi lært að taka betri ákvarðanir og bætt fjárhagslega heilsu sína og fjölskyldunnar. Hún deilir góðum ráðum í átt að bættri fjárhagslegri heilsu. Þóra er fjölskyldumanneskja, lögfræðingur og ein af stofnendum Hæglætishreyfingarinnar. Sjá meira um Þóru hér: https://www.haeglaeti.is/thorajonsdottir.

Í þessum þætti ræðir Þóra Jóns við Dögg Árnadóttur, nýja stjórnarkonu í Hæglætishreyfingunni. Dögg er lýðheilsufræðingur og viðskiptafræðingur, þriggja barna einstök móðir. Hún er að hefja starfsemi nýsköpunarhugmyndar sem ber heitið SamskiptaRæktin en hún veitir þjónustu fyrir fólk sem vill ástunda samskipti sem eru heilsurækt. Í samtali Þóru og Daggar birtast augljós jákvæð tengsl hæglætis og samskipta sem geta sannarlega verið heilsurækt ef þau fá rétta næringu og ef við lærum og þjálfum okkur í meðvituðum uppbyggjandi og jákvæðum samskiptum. Ávinningur hæglætis getur verið mikill fyrir félagsleg tengsl okkar og samskipti. Hlustið endilega og segið okkur hvernig ykkur líkar á miðlunum okkar, Hæglæti á Facebook og Instagram sem og í hópnum Hæglætishreyfingin á Facebook. Hægt er að gerast félagi í Hæglætishreyfingunni með því að skrá sig hér: https://www.haeglaeti.is/skr%C3%A1%C3%B0u-%C3%BEig-%C3%AD-f%C3%A9lagi%C3%B0. SamskiptaRæktina má finna á Facebook og Instagram.

Í 14. þætti Hæglætishlaðvarpsins spjalla Bjarney Kristrún og Hekla Guðmunds um hæglæti og króníska verki. Þær deila með hlustendum ýmsum bjargráðum til að draga úr krónískum verkjum. Hvernig geta þeir sem eru með króníska verki tileinkað sér hæglæti? Hver er gagnsemi þess að nýta hæglæti við iðkun æfinga og mikilvæg þess að setja sjálfan sig í fyrsta sæti? Munum að árangur tekur tíma og hve mikilvægt það er að draga úr kröfum á sjálfan sig og aðra.

Í þessum þætti Hæglætishlaðvarpsins spjalla Þóra og Guðrún Helga um hæglæti yfir aðventuna og í aðdraganda jólanna, umhverfisvæn jól, jólaskreytingar, jólagjafir, jólahefðir og samveru með fjölskyldu. Líka um sjálfsumhyggju í aðdraganda jóla, um vonir og hóflegar væntingar og hvernig megi hlusta vel á og vera í athygli og meðvitund með fólkinu sínu á aðventunni. Hæglætishlaðvarpið er oftast tekið upp á netinu því aðstandendur búa vítt og breitt um heiminn. Þess vegna geta verið hljóðtruflanir en við látum það ekki á okkur fá og þökkum hlustendum fyrir þolinmæðina og skilninginn. Okkur þykir mest um vert að geta gert þættina og meira virði en að gera þá með fullkomnum hætti. Fullkomlega ófullkomið og lífrænt, það er best.

Í þessum þætti fjalla Þóra og Nína um fjármál og hvernig hæglætislíf styður við heilbrigð fjármál. Í þættinum bendir Nína á bókina "The barefoot investor" eftir Scott Pape. www.barefootinvestor.com. Aðrir hlekkir á góð hlaðvörp um fjármál fyrir áhugafólk: Leitin að peningunum: https://open.spotify.com/show/2hM42oDmVZObrg2LFulz0G?si=c877b0f72778498c Peningakastið: https://open.spotify.com/show/3XUDkapGrOlgSNkcnN6UiJ?si=d76fa79bb27a4a62

Í þessum þætti ræðir Þóra Jónsdóttir við Dominique Plédel Jónsson, formann Slow food hreyfingarinnar í Reykjavík og á Norðurlöndum. Dominique er uppfull af dýrmætum fróðleik um Slow food hugmyndafræðina og um gagnsemi hennar fyrir lífríkið og samfélög. Mjög gott og upplýsandi spjall við konu sem hefur barist lengi fyrir vitundarvakningu þegar kemur að lífrænni ræktun og ábyrgri matvælaframleiðslu og neyslu. Slow food er einn þáttur hugmyndafræðinnar um hægara líf eða slow living. Gefið ykkur að leggja við hlustir með athygli og í hæglæti.

Í 10. þætti Hæglætishlaðvarpsins hittast Þóra, Ágústa Margrét og Nína og spjalla saman um markmið og hæglæti. Hvernig tengjast markmið hæglæti? Passar að setja sér markmið þó manneskja velji að lifa í hæglæti? Hvernig nýtast markmið hæglætislífi? Það er spennandi hvað hægt er að lifa auðugu lífi og gera margt og skemmtilegt í hæglæti. Þannig nýtast markmiðin nefnilega vel. Án þess að ætla að spilla hlustuninni ;) Vonandi njótið þið þess að hlýða á.

Í desemberþætti Hæglætishlaðvarpsins er fjallað um hátíðahöld í hæglæti, jól og jólaundirbúning í minna stressi og í núvitund. Þóra og Guðný Valborg spjalla um hefðir, tilgang þeirra og mismikinn heilagleika, leiðir til að einfalda lífið í jólaundirbúningi og um jól með minimalísku ívafi. Viðhorf okkar til jóla eru misjöfn eftir því hver bernskureynslan er, sumir upplifa jól sem töfrandi tíma en aðrir eru kvíðnir og stressast upp í aðdraganda jóla. Jólin eru hátíð barnanna, fullorðinna barna sem annarra barna. Jólin virðast töfrast fram í augum barnanna. En töfrarnir byrja og verða til með to-do lista einhverrar töframanneskju. Magnað nokk. Við vonum að þið njótið hlustunarinnar. Gleðilega hæglætis-jólahátíð.